Estás en:Emprego Novas

Os Premios Youtubeiras abren a inscrición dunha quinta edición que buscará a consolidación da comunidade creadora “que medrou ao abeiro do concurso”

Youtubeiras é unha iniciativa organizada polos servizos de normalización lingüística dos concellosda Baña, Ames, O Grove, Moaña, Negreira, Pontevedra, Ribadeo, Rianxo, Santiago de Compostelae Teo, das universidades da Coruña, Santiago e Vigo e da Deputación da Coruña


Os galardóns, que este ano teñen como lema 'Magnetismo en liña', repartirán un total de 7.500euros entre as persoas gañadoras da ducia de categorías nas que se divide o certame

Os Premios Youtubeiras abren a inscrición dunha quinta edición que buscará a consolidación da comunidade creadora “que medrou ao abeiro do concurso”

Os Premios Youtubeiras, organizados polos servizos de normalización lingüística de dez concellos, das tres universidades e da Deputación da Coruña, abren o prazo de inscrición para a súa quinta edición, que terá como principais obxectivos impulsar a formación e consolidar a comunidade creadora que xurdiu ao redor desta iniciativa. "Dende a primeira edición destes premios, alá por 2017, até o día de hoxe, a comunidade de youtubeiros e youtubeiras que publican contidos na nosa lingua non deixou de medrar ao abeiro do concurso", sinalou Carme
Pereiro, coordinadora do Proxecto Youtubeiras, quen anunciou hoxe en Santiago ante os medios os detalles desta quinta edición. Pereiro púxolle cifras ao grande incremento de participantes nestes anos ao sinalar que "en 2017 concorreron 202 vídeos", mentres que na convocatoria de 2020 "a cifra ascendeu até os 536". Nesta convocatoria tense a vontade de superar a marca, malia que o prazo de inscrición para participar é menor que o de edicións anteriores, xa que se limitará a tan só dous meses. O prazo
rematará así o 22 de outubro.

Pereiro, ademais, engadiu na súa intervención que este ano, "co obxectivo de fomentar a creación de canles, pero tamén o seu mantemento", non se poderán presentar vídeos illados como en anos anteriores. Esa é a gran novidade nas bases destes V Premios Youtubeiras que, por segunda edición consecutiva, se dividirán en 12 categorías: canle, vídeo, youtubeiro/a, calidade lingüística, impacto, calidade técnica, comunicación, creatividade, musical, didáctico, pioneiro e premio do público. Os tres primeiros acompañaranse cunha dotación económica de 1.000 euros, mentres que os nove restantes chegarán aos 500 euros. Poderán aspirar a gañar os galardóns nestas doce categorías todas as persoas creadoras de contidos en lingua galega maiores de catorce anos con canles de Youtube,autoproducidas e que teñan polo menos cinco vídeos publicados con data posterior ao 23 de outubro de 2020.

'Magnetismo en liña' e formación
Neste quinto ano, escolleuse como lema a frase Magnetismo en liña, co obxectivo de remarcar a evolución do proxecto dende a súa posta en marcha. "O que se pretende con esta idea do magnetismo é incidir na atracción en canto á consolidación da figura de youtubeira e youtubeiro, ao tempo que se subliña a influencia que o mundo youtubeiro exerce xa na sociedade", explicou Carme Pereiro antes de centrarse noutro dos piares da edición deste 2021: a formación.

Os Premios Youtubeiras, que teñen como finalidade ser acicate da creación en Youtube con temáticas e formatos diversos, así como promover e visibilizar  as/os youtubeiras/os en galego, ofrecerán novas formacións nos próximos meses, que lle darán continuidade ao obradoiro impartido por Xoán Escudero ao comezo do verán, centrado na mellora da calidade sonora dos vídeos. Neste mes de setembro, Adrián Suárez impartirá un curso sobre posicionamento na creación dixital e por último en outubro, Bárbara Román, avogada especializada en empresas tecnolóxicas, desenvolverá aspectos legais do Youtube. Deste xeito, a formación nesta quinta edición pretende ser máis especializada.

O xurado
Por último, durante a presentación desta mañá anunciouse a constitución do xurado que decidirá quen gaña  en todas as categorías, agás no caso do Premio do Público. O sociolingüista Fernando Ramallo, o xornalista Adrián Lede, a profesora de lingua galega Noemí García, a realizadora e coordinadora do Carballo Interplay Sonia Méndez e Esther Estévez, xornalista e responsable do #DígochoEu da Televisión de Galicia, conformarán o xurado que, a partir da próxima edición, incluirá a persoa gañadora do premio ao mellor Youtubeiro/a.

Páxinas suxeridas
Visítanos en   Chámanos ao 981 080 509, escríbenos a  pel@dacoruna.gal , realiza unha consulta (formulario) ou solicita unha cita presencial X