A Deputación e o Concello de Carnota asinan o convenio para financiar as obras de mellora enerxética do campo de fútbol de Lombáns
A entidade provincial achega o 80 % do orzamento total, que ascende a 115.000 euros
A actuación inclúe a instalación de novas luminarias LED
A Deputación da Coruña e o Concello de Carnota destinarán 115.000 euros para cofinanciar as obras de mellora de eficiencia enerxética do campo de fútbol de Lombáns.
O presidente da Deputación, Valentín González Formoso, e o alcalde de Carnota, Juan Manuel Saborido, asinaron o convenio, polo que a institución provincial asumirá o 80% do investimento e o Concello de Carnota o 20% restante.
O proxecto inclúe a renovación das luminarias existentes, substituíndo a tecnoloxía actual por equipos LED para mellorar a eficiencia enerxética da instalación, localizada no lugar de Capelán, na parroquia de San Mamede.
En concreto, na actuación enmárcase a substitución dos proxectores que iluminan o terreo de xogo; o tendido de novas rede de terra para acompañar a liña subterránea de alimentación aos proxectores; a adecuación da instalación de iluminación e forza interior e a realización de novos cadros de mando.
Con estes traballos búscase mellorar as condicións enerxéticas do lugar, acadando unha maior visibilidade en horas de pouca luz, o que permite maior tempo de uso do campo á vez que se consegue unha menor gasto enerxético.
