A Deputación estuda as alternativas para ampliar a ponte de Barbazán, na estrada Negreira-Pontenafonso
Tal como comprometeu o presidente da Deputación da Coruña, Valentín González Formoso, co alcalde de Negreira, Manuel Ángel Leis, a Deputación avanza nas melloras da seguridade da estrada provincial DP 5602 Negreira- Pontenafonso.
A deputada de Vías e Obras, Mónica Rodríguez, acompañado do alcalde e de persoal técnico do departamento provincial de estradas e do equipo encargado da redacción do proxecto supervisou a zona da ponte de Barbanzán para coñecer in situ as diferentes alternativas que se contemplan para ampliar a estrada nesta zona, onde a vía se estreita notablemente, e ocasiona un problema de seguridade.
Mónica Rodríguez lembrou que a Deputación executou nos últimos anos un investimento de máis de 2,5 millóns de euros para a ampliación e mellora da estrada nos seus primeiros oito quilómetros (as obras da segunda fase están practicamente rematadas neste momento) e pretende agora "completar o traballo eliminado o estreito paso da ponte sobre o río Corzán para que a vía teña neste tramo as mesmas características de anchura e seguridade que no resto".
"Estamos valorando a mellor opción posible desde o punto de vista técnico e económico co equipo redactor do proxecto. O noso obxectivo é completar a actuación cunha mellora integral da seguridade ao longo de toda a vía, para o que é preciso construír unha nova ponte", afirmou a deputada.
