A deputada de cultura salienta no I Foro da Industria Galega do Audiovisual o potencial “deste sector estratéxico para o noso país”
A titular da área de cultura da Deputación, Natividad de Jesús González, participou esta mañá na inauguración do FIGA (Foro da Industria Galega do Audiovisual)
A Academia Galega do Audiovisual contou co apoio da Deputación da Coruña para a celebración deste evento
A Cidade das TIC acolleu esta mañá a inauguración do I Foro da Industria Galega do Audiovisual, FIGA, na que participou a deputada de cultura, Natividad de Jesús González. En representación da entidade provincial, que colaborou coa Academia Galega do Audiovisual para a celebración deste encontro, a responsable da área de Cultura puxo en valor o sector audiovisual do país, "un sector estratéxico porque conecta a parte económica e industrial coa cultural", apuntou.
A deputada sinalou así a importancia de vincular a industria audiovisual co territorio, "desde a nosa condición de cultura e de identidade propia no mundo" puntualizou. "O noso audiovisual terá valor se somos capaces de achegar a nosa mirada, e iso precisa poder contar e mirar o mundo desde nós".
Este foro, que se celebra dende o 9 ata o 11 de novembro, reúne a expertos de todo o mundo para abordar os desafíos e oportunidades da intelixencia artificial para o sector. "Nos últimos anos estamos a ver un crecemento e transformación exponenciais do audiovisual en Galicia, que crea novas oportunidades e enfrenta novos retos" destaca Natividad González, "e esta situación de cambio hai que abordala desde a cooperación, a implicación do sector público e privado, o coñecemento e a reflexión".
O FIGA será o punto de encontro para o debate sobre as inquedanzas dunha industria "con moito talento creativo e cunha cultura propia que a diferencia". Por iso, dende a Deputación, "precisamos acompañar estas fortalezas de solvencia económica e fortaleza estrutural".
