A Copa Deputación de Balonmán na Rúa chega esta fin de semana a Oroso

A pista de balommán instalada na Alameda de Gois (Oroso) acolle durante esta fin se semana os partidos da Copa 5x5 Deputación da Coruña, que pretende levar este deporte a nenos e nenas de entre 6 e 11 anos dunha forma lúdica e divertida.

O evento, que se celebra en Oroso tras o seu paso pola cidade da Coruña e os concellos de Negreira, Sada e Zas recalará nun total de sete concellos da provincia. O circuíto contará coa participación de máis de 1.600 deportistas e pretende achegar o deporte do balonmán a todos os públicos e favorecer a práctica desta disciplina deportiva.

No caso de Oroso, participan un total de 24 equipos, dez deles locais, e máis dun centenar de nenos e nenas.

Na Alameda de Gois está xa instalada unha pista de mini-balonmán ao aire libre, con bancadas para 250 persoas para que familias e afeccionados poidan gozar vendo en acción os máis pequenos/as.

A pista dispón de marcador electrónico, unha gran pantalla LED, megafonía, speaker e comentaristas e nalgunhas sedes incluso un dron para as tomas aéreas do evento, configurando un gran espectáculo para toda a familia no que os pequenos e pequenas deportistas son os protagonistas.

O deputado de Deportes, Antonio Leira Piñeiro, participará o domingo 2 de xuño ás 13.30 horas, no acto de entrega de medallas e trofeos aos gañadores do evento de Oroso. O circuíto continuará ata finais de xuño nos concellos de Cedeira e Ribeira.