Este sábado, gala final do Premio Narf con Carabela, Gloria Pavía e Rafa Morales, e Cintaadhesiva, ademais da banda convidada De Ninghures
A final terá lugar no seo dunha gala no Auditorio Abanca de Santiago de Compostela este sábado 19 de outubro
Os grupos elixidos son boa mostra da calidade e diversidade que poboa hoxe en día a música galega
Esta mañá presentouse en rolda de prensa a gala final do Premio Narf que terá lugar este sábado 19 de outubro no Auditorio Abanca ás 20 horas. O acto tivo lugar no pub Modus Vivendi, onde ten tocado con frecuencia o propio Fran Pérez ademais dunha das finalistas, e participaron todas as bandas (Ana Moas de Carabela, Gloria Pavía e Rafa Morales, e Silvia Penas de CintaAdhesiva, ademais de Manuel Lucas de De Ninghures (banda convidada), a comisaria do Premio, Rocio Castro, e a deputada de Cultura da Deputación da Coruña, Natividad González.
González destacou que a gala "un ano máis será un espazo para desfrutar, para lembrar a Fran Pérez "Narf", pero sobre todo para reflexionar sobre o papel da música como forma de expresión identitaria e de conexión entre culturas, para recoñecer a excelencia na música e na creación artística dentro do panorama galego, así como promover a proxección dos artistas".
A gala acollerá as actuacións de 15 minutos das tres bandas gañadoras e o xurado (formado por Martiño Suárez, Faia Díaz, Teresa Cuíñas, Noel Feáns e Rodri Míguez) decidirá o gañador, que levará 4.000 euros, o segundo clasificado 2.000 e o terceiro 1.500. Durante a súa deliberación, os asistentes poderán disfrutar da actuación de De Ninghures, unha banda emerxente de folc que fará bailar a todos os presentes.
A final será presentada polo xornalista Luís Pardo, e aos mandos dos efectos visuais estará o artista Xavier Belho.
O Concurso Fran Pérez "Narf" de música ten o obxectivo de difundir, apoiar e promocionar os grupos e artistas musicais das diferentes comarcas e localidades galegas, así como lembrar e difundir socialmente a figura e a o obra do músico e compositor Fran Pérez "Narf". Algunhas das bandas gañadoras deste premio son Caldo, Mounqup, Bala ou Familia Caamagno, entre outros.
As bandas finalistas deste ano son Carabela, Gloria Pavía e Rafa Morales, e Cinta Adhesiva.
CARABELA: Deles o xurado destacou que é "unha proposta construída con solidez, que atende o traballo vocal e tamén a melodía, cunha deriva electrónica delicada e sofisticada". Nados en 2021, esta banda noiesa dálle unha nova volta ao ao temón da cada vez máis natural confluencia entre as correntes do pop, a electrónica e a música tradicional.
GLORIA PAVÍA E RAFA MORALES: O xurado salientou desta proposta que chega desde Santiago a "utilización de elementos moi escollidos que fan lucir a estrutura das cancións de autora", na que tamén destacan o seu talento vocal, a orixinalidade e o minimalismo.
CINTA ADHESIVA: Formada pola poeta Silvia Penas e o músico Jesús Andrés Tejada, o xurado destacou a súa "proposta arriscada, que combina con destreza as partes melódicas e as recitadas con bases electrónicas escuras".
