Exposicion BookFaceFriday 2024
Quinto ano desta mostra que de maneira tan divertida pretende chamar a atención para incentivar a lectura e o uso das bibliotecas.
Proseguimos con esta divertida actividade, e xa van 5 anos de reto!
Igual que fixemos outros anos, para os novos seguidores que aínda non saibades de que vai o proxecto, contámosvos un pouco en qué consiste este movemento a nivel mundial, que comezou alá por 2014 en Twitter e Instagram a iniciativa da Biblioteca Pública de Nova York.
Co cancelo #bookfacefriday, todos os venres bibliotecas de diversos lugares do mundo coinciden en publicar recomendacións de libros dos seus fondos dun xeito orixinal, que consiste en seleccionar a portada e completala e ambientala con persoas e escenarios reais.
A Biblioteca Provincial da Deputación da Coruña adheriuse en novembro de 2019, contando cada vez con máis persoas adeptas e seguidoras que están a desexar que chegue o venres para saber con que imos sorprender desta vez.
Este pasado novembro de 2024, completamos xa outro reto de publicar 52 fotografías (1 por semana) que permitan atraer a novas persoas lectoras, e sobre todo incitar a todo o público que as vexa a ver a literatura con outra ollada e interesarse polos argumentos dos libros que recomendamos, que procuramos que sexan do máis variado, pero tamén relacionados con datas sinaladas ou especiais.
Con esta exposición queremos novamente dar visibilidade, máis aló das redes sociais, ás recomendacións literarias de todo o ano. Agardamos poder inspirar novas ideas de lectura, especialmente para a fin de semana, xa que se publican todos os venres.
Como dicimos en cada unha das recomendacións: "E ti, que vas ler esta finde?"
Grazas a todo o equipo que está detrás do proxecto, sen o que este proxecto sería misión imposible (modelos, suxeitalibros, fotógrafos, vestiario, ambientación...)
Podeslle botar unha ollada ao catálogo da exposición antes de pasar pola biblioteca e desfrutar in situ desta maravillosa mostra. A entrada é de balde e está situada na entrada da biblioteca en horario ininterrompido de 8:30 a 20:30.
Agardámoste.