"A culpa", a nova lectura na sala Tinta e equidade

Comezamos a nova lectura na sala "Tinta e equidade" do club dixital de lectura da Biblioteca Provincial da Deputación da Coruña. Lembrámosche os datos desta actividade:

• "A culpa", de María Solar.
• Moderado por Maitane Vicente Mariño
• Do 14 de maio ao 7 de xuño
• Accede premendo aquí

Sobre a obra

Amanda non só herdou unha fortuna, tamén herdou unha culpa.

Cada seis meses, coma un cravo, os empregados dunha pequena sucursal bancaria reciben a visita desagradable da señora Gondar, unha muller de aspecto miserable e cun fedor corporal insoportable que controla ata o mínimo detalle as súas contas millonarias. Amanda, unha novísima empregada da oficina, aténdea unha soa vez. Un mes despois do encontro, a señora Gondar falece e Amanda convértese inesperadamente na súa única herdeira. A moza, xunto co seu amante xornalista, Enric, comeza unha investigación sobre a identidade da anciá e descobre a historia vital que uniu de por vida a dúas mulleres poderosas: os terribles segredos que as devoran, as culpas que as perseguen e a tóxica relación entre elas que remata nun final perturbador. Amanda non só herdou unha fortuna, tamén herdou unha culpa.

Con «A culpa» María Solar mergúllanos nunha narrativa na que non podemos tomar alento ata desvelar por completo esta historia de dominación, tolemia e morte onde a culpa é omnipresente.

Foi, ademais, Premio Xerais de Novela 2022.

---

Preme para máis información sobre a sala Tinta e equidade