A deputada de cultura, Natividade González, inaugura en Mariñán as III Xornadas da Academia Galega de Teatro
O Pazo de Mariñán acolleu esta mañá a inauguración das III Xornadas da Academia Galega de Teatro "Teatro e sociedade: na procura dun público posible", que se desenvolven do 29 ao 31 de maio
"O público non é unha masa anónima, senón persoas diversas, con intereses, inquedanzas, tempos e vidas distintas. E conseguir que ese público se achegue ao teatro, se sinta parte del, é unha tarefa que nos implica a todas: ás creadoras, aos espazos, ás institucións, á administración, e tamén ao público mesmo" sinalou a titular de cultura
O Pazo de Mariñán acolle do 29 ao 31 de maio as III Xornadas da Academia Galega de Teatro "Teatro e sociedade: na procura dun público posible". A deputada de cultura, Natividade González, participou esta mañá na inauguración, acompañada da presidenta da AGT, Imma António, e do director da Agadic, Jacobo Sutil Nesta, onde sinalou que "o teatro sempre foi un espello da sociedade, un espazo onde nos vemos, nos escoitamos, nos emocionamos. E tamén é unha arte que, como ben dicides, precisa do público para existir."
"Por iso me parece tan importante o tema destas xornadas: na procura dun público posible", engadiu a deputada. "Porque o público non é unha masa anónima, senón persoas diversas, con intereses, inquedanzas, tempos e vidas distintas. E conseguir que ese público se achegue ao teatro, se sinta parte del, é unha tarefa que nos implica a todas: ás creadoras, aos espazos, ás institucións, á administración, e tamén ao público mesmo".
Neste sentido, González destacou o compromiso da Deputación: "temos moi claro que a cultura non é un luxo, senón un dereito. E, sen cultura, non hai cidadanía plena. Por iso apoiamos espazos coma este, de pensamento, encontro e diálogo horizontal. Con voces diversas pero cun obxectivo común: facer medrar o teatro galego". A deputada agradeceu tamén o traballo da organización, "pola vosa capacidade de reflexión colectiva e pola aposta decidida por facer do teatro unha ferramenta viva, social e transformadora".
III Xornadas da Academia Galega de Teatro "Teatro e sociedade: na procura dun público posible" reúne en Mariñán, durante tres días, a diferentes representantes do sector en Galicia, que abordarán temáticas como a relación cos públicos desde a perspectiva de creadores e creadoras e dos espazos, así como as boas prácticas na xestión de públicos, con preto dunha vintena de relatores pertencentes aos diferentes ámbitos do teatro.
