A Deputación entrega este sábado os Premios Rosalía de Castro a Pilar García Negro, Nova Escola Galega e Aquí tamén se fala
As tres propostas gañadoras do XV Premio Rosalía de Castro de Lingua, que convoca a Deputación da Coruña, recollerán o seu galardón no coruñés Circo de Artesáns ás 11h
O acto, conducido por María Obelleiro, contará coas intervencións da deputada de lingua e das persoas gañadoras e coa actuación da cantante Marián Romero
A deputada de lingua, Soledad Agra, entrega este sábado os galardóns ás propostas gañadoras do XV Premio Rosalía de Castro: Pilar García Negro, Nova Escola Galega e Aquí tamén se fala, nun acto que terá lugar ás 11h no Circo de Artesáns da Coruña, e que contará tamén coa actuación da cantante Marián Romero.
O obxectivo destes premios é recoñecer, en memoria de Rosalía de Castro, iniciativas, traballos recentes, traxectorias de persoas individualmente, colectivos ou entidades comprometidas coa promoción e dignificación do noso patrimonio lingüístico, facendo especial fincapé no traballo cos sectores de especial relevancia para o futuro do galego.
Deste xeito, os tres proxectos galardoados neste certame reciben un importe de 5.000€ cada un. Na categoría A, para persoas, a gañadora foi a escritora, sociolingüista, política e profesora Pilar García Negro; na categoría B, para entidades, o movemento de renovación pedagóxica Nova Escola Galega e, na categoría C, para iniciativas de dinamización para a poboación de menor idade, o proxecto Aquí tamén se fala, promovido polo IES Rafael Dieste.
Conducido pola xornalista María Obelleiro, o evento contará coas intervencións da deputada, Soledad Agra, e das persoas e entidades premiadas.