A Deputación dá luz verde a un investimento de 289.000 euros para un novo tramo da Vía Verde en Santiago
Valentín González Formoso e Goretti Sanmartín asinaron hoxe o convenio polo que a Deputación inviste 289.216,39 euros de fondos Next Generation no tramo 2.1 da Vía Verde, cunha lonxitude de 3,1 quilómetros
A Deputación financia tamén as actividades do Festival Rosalía os días 21, 22 e 23 de febreiro en Santiago
O presidente da Deputación da Coruña, Valentín González Formoso, e a alcaldesa de Santiago, Goretti Sanmartín, asinaron esta mañá na sede da institución provincial o convenio para financiar o tramo 2.1 da Vía Verde Compostela-Tambre-Lengüelle. Para este fin, a entidade provincial aportará 289.216,39 euros con cargo ao PSTD da Vía Verde, dentro do Plan de Recuperación, Transformación e Resiliencia con fondos Next Generation EU. Ao acto asistiu tamén a deputada de Medio Ambiente, Rosa Ana García.
O treito 2.1 da Vía Verde, que discorre ao completo polo termo municipal de Santiago de Compostela, conta cunha lonxitude a acondicionar de 3.170 metros, dende o punto quilométrico 7+010, no acceso á aldea de Ramelle, ao 10+180, na ponte sobre o río Tambre. Neste tramo contémplanse as obras necesarias para o uso do trazado por cicloturistas e camiñantes, con actuacións sobre o firme e a drenaxe, ou a construción de muros, varandas e outros elementos de seguridade.
Este proxecto é a primeira das dúas subfases necesarias para completar o tramo II da Vía Verde, a parte que resta para completar dita infraestrutura.
Formoso indicou que con este convenio "damos un paso máis para conectar a cidade de Santiago coa maior Verde de Galicia e completar os 36 quilómetros dun itinerario que non só recupera a historia e patrimonio ferroviario da comarca, senón que xa é unha referencia no ámbito da mobilidade sostible e un lugar para o lecer e a práctica do deporte en plena natureza para miles de usuarios"
As obras no primeiro tramo da Vía Verde en Compostela, que van dende a estación da Sionlla ata o punto quilométrico 2+200, arrincaron a finais de setembro de 2024, iniciando a conexión da cidade de Santiago coa Vía Verde, e avanzan a bo ritmo.
En total, o conxunto das actuacións nos tramos I e II suporán un investimento de máis de 1,8 millóns de euros e permitirán sumar 10 quilómetros máis aos 26 que xa compoñen a Vía Verde, a maior de Galicia, atravesando os concellos de Oroso, Ordes, Tordoia e Cerceda.
Acondicionamento dos tramos existentes
Hai poucos días, a Deputación asinou tamén un convenio coa Asociación de Concellos da Vía Verde Compostela-Tambre-Lengüelle, para financiar as obras de acondicionamento e mantemento de diferentes treitos xa existentes desta infraestrutura. A Deputación financia ditas actuacións con 128.000 euros, que se corresponden a preto do 86% do importe total orzamentado, que ascende a 149.108,84 euros.
As actuacións de mellora inclúen a recuperación de camiños de servizo e trazados alternativos á Vía Verde, a mellora do alumeado do túnel situado no concello de Oroso, a instalación de zonas Wifi, a consolidación de noiros para evitar desprendementos, a recollida de augas pluviais con orixe en pasos elevados e obras de drenaxe.
Festival Rosalía
Formoso e Sanmartín asinaron tamén, xunto coa deputada de Cultura, Natividad González, o convenio de colaboración para o Festival Rosalía, que se celebra do 21 ao 23 de febreiro en Santiago de Compostela, e que financia a institución provincial con 58.226 euros.
Baixo o lema Sen pombas nin flores, inspirado nun verso rosaliano tirado de Follas Novas, desenvolverase un amplo programa que inclúe visitas guiadas á casa da autora en Padrón, recitais, animación de rúa, concertos e teatro nas rúas de Compostela.
O Festival Rosalía inclúe este ano presentacións como 'Somos Pandereteiras', proxecto promovido por Mercedes Peón, ou espectáculos poético-musicais como 'A Primavera vai chegar', de Faia Díaz, Paula Romero e Inés Salvado.
