O Festival Rosalía recupera como espazo de memoria rosaliana o Colexio Maior de Santo Agostiño da man de Faia Díaz, Paula Romero e Inés Salvado
'A primavera vai chegar', que reúne as tres voces neste espectáculo de música e poesía, ofrecerá dúas sesións íntimas o domingo 23 de febreiro na antiga sede do 'Liceo de la juventud' no que tanto se implicou Rosalía
A sétima edición do festival, organizado pola Deputación da Coruña en colaboración co Concello de Santiago, abrirá a súa programación o venres 21 cunha visita guiada por Anxo Angueira á Casa Rosalía en Padrón
O Festival Rosalía, organizado pola Deputación da Coruña en colaboración co Concello de Santiago de Compostela, celebrará entre os días 21 e 23 de febreiro a súa sétima edición para conmemorar o 188º nacemento da escritora, figura poliédrica das nosas letras que ano a ano continúa a se enriquecer a medida que evoluciona a nosa cultura. Neste 2025, o programa desenvolverase baixo o lema Sen pombas nin flores e recuperará como escenario un espazo de memoria rosaliano: o actual Colexio Maior de Santo Agostiño. Este lugar acolleu no século XIX o Liceo de la Juventud de Santiago, onde Rosalía de Castro participo nas súas actividades con regularidade. Nel iniciouse en diferentes disciplinas artísticas e musicais, destacando a súa participación en obras teatrais como Rosamunda, de Antonio Gil y Zárate.
Para lembrar esta etapa iniciática da autora de Follas novas, o Festival Rosalía programa no Colexio Maior de Santo Agostiño A primavera vai chegar, un diálogo a tres voces de música e poesía da man de Faia Díaz, Paula Romero e Inés Salvado. Trátase dunha proposta para aforo reducido que procura a intimidade do espazo, as resonancias da arquitectura e a voz da poeta como un eco aínda vivo e necesario a día de hoxe. Ofreceranse dous pases: o primeiro ás 16.00 horas e o segundo, ás 17.15 horas.
A primavera vai chegar é unha das propostas poéticas que o Festival Rosalía inclúe no seu programa. Neste senso, cómpre destacar tamén a cita Rosalía de Castro, como cor de ouro pálido, de Rafa Fernández, Lara Dopazo e Iván Torres. A poesía de Rosalía serve de nexo de unión nesta peza para que a música, a videocreación en vivo e a poesía converxan nunha conversa a tres bandas. Poderase ver na praza de Mazarelos o domingo ás 17.00 horas.
O día antes, o sábado ás 18.30 horas e no mesmo recinto, terá lugar o recital que xuntará as poéticas de Nuria Vil, Andrea Nunes e Anxo Angueira. Este último, ademais, participará na presentación do libro Cantares miúdos ao remate do recital.
Visita Guiada á Casa Rosalía
O presidente da Fundación Rosalía, o xa citado Anxo Angueira, encargarase de conducir o venres pola a visita guiada coa que o Festival Rosalía abrirá a súa programación este 2025. Esta ruta pola Casa da Matanza ten as prazas limitadas e desde Santiago sairá un bus fretado pola organización. A inscrición, gratuíta como o conxunto do programa, realizarase a través desta ligazón: https://i.gal/VisitaRosalia. O bus sairá ás 16.30 de Santiago e a visita guiada principiará ás 17.00 horas.
