O Festival Rosalía arrinca mañá un programa de tres días de música, teatro e poesía coa visita guiada por Anxo Angueira á Casa Museo da escritora en Padrón
A Deputación da Coruña, coa colaboración do Concello de Santiago de Compostela, conmemorará na praza de Mazarelos o 188º aniversario do nacemento da autora, cunha programación que se estende por vez primeira a tres xornadas
O festival, que se celebra baixo o lema 'Sen pombas nin flores', inclúe presentacións como 'Somos Pandereteiras', proxecto promovido por Mercedes Peón, ou espectáculos poético-musicais como 'A Primavera vai chegar', de Faia Díaz, Paula Romero e Inés Salvado
O Festival Rosalía dará comezo mañá á súa sétima edición, que se celebrará até este domingo cun amplo programa que inclúe, entre outras actividades, recitais de poesía, montaxes teatrais, concertos ou animación de rúa. O evento, organizado pola Deputación da Coruña coa colaboración do Concello de Santiago de Compostela, conmemorará o 188º nacemento da autora baixo o lema Sen pombas nin flores, inspirado nun verso rosaliano tirado de Follas Novas.
O cartel desta sétima edición abrirase este venres cunha visita guiada ás 17.00 horas á Casa Rosalía (Padrón) co presidente da Fundación Rosalía, o poeta e profesor Anxo Angueira. A organización fretará un autobús para acudir dende Santiago de Compostela, con saída ás 16.30 horas dende a dársena do colexio La Salle. As reservas pódense realizar aínda a través desta ligazón: https://i.gal/VisitaRosalia. Deste xeito, o Festival Rosalía amplía o seu campo de acción ao incluír esta actividade que se desenvolverá en Padrón. Xa na fin de semana, o evento concentrarase como é habitual na compostelá praza de Mazarelos, aínda que tamén se realizarán actuacións no Teatro Principal e no Colexio Maior de Santo Agostiño.
Programación do sábado
O Festival Rosalía arrincará o sábado ás 11.00 horas coa feira, situada na praza de Mazarelos. A Libraría Pedreira, Árbore Azul, 13D Deseño Galego Impreso en 3D, Casperolota Atelier, Cuire Acuarelas, Acontravento, Egretta Biloba e Coas Mans Artesanía formarán parte da feira, que estará aberta o sábado en horario de 11.00 a 14.30 horas e de 16.30 a 20.00 horas. Ás 11.30 horas, Os Quinquilláns darán comezo ao seu Pasarrúas rosaliano, unha ruta teatralizada que percorrerá diferentes lugares da cidade.
Ás 12.00 horas, celebrarase o obradoiro de Regueifa para familias e unha mostra de improvisación, a cargo de Regueifa Tour e coa participación de Manolo Maseda e Séchu Sende, do proxecto Regueifesta. Ás 13.45 horas, a sesión Vermú correrá a cargo do Coro Encaixe.
A praza de Mazarelos recibirá ás 17.00 horas Somos pandereiteiras, proxecto promovido por Mercedes Peón e composto por tres grupos de pandereiteiras: Raigañas de Cerqueda (Malpica de Bergantiños), Xirifeiras (Fene) e a Asociación Cultural Rosalía de Castro (Padrón), que reflexionarán sobre outras formas de vivir a música desde a sororidade e coa convicción de crear o novo relato da existencia como tocadoras.
Ás 18.30 horas, terá lugar un recital poético con Anxo Angueira, Nuria Vil e Andrea Nunes. Tras o recital realizaranse dúas presentacións de títulos editoriais. Por un lado, presentarase Cantares Miúdos e, polo outro, Rosalía oculta, banda deseñada da autora Paula Mayor galardoada co Premio Castelao da Deputación da Coruña. Xa ás 20.00 horas, o Teatro Principal pechará o sábado co concerto da formación Tres Pesos, integrada por Felisa Segade, Xoán Porto e Xosé Antón Ferreira.
A xornada do domingo
O domingo, a feira –para non solaparse coa manifestación convocada ás 12.00 horas na Alameda por Queremos Galego– abrirá ás súas portas ás 13.30 horas e a sesión vermú será ás 14.00 horas da man de Clo Plas, proxecto performativo de Berio Molina e Xiana Arias que mestura a oralidade da montaña de Lugo coa música experimental e o midi. Xa pola tarde, ás 16.00 horas, celebrarase en Mazarelos o Quizz Rosaliano, un xogo para toda a familia arredor da figura de Rosalía de Castro.
Rafa Fernández, Lara Dopazo e Iván Torres actuarán ás 17.00 horas tamén en Mazarelos coa súa proposta Rosalía de Castro, como cor de ouro pálido. Neste proxecto a poesía rosaliana serve de nexo de unión para a música a videocreación ao vivo e a poesía.
O Colexio Maior de Santo Agostiño será o escenario escollido para o espectáculo A primavera vai chegar, un diálogo a tres voces con Faia Díaz, Paula Romero e Inés Salvado. Esta proposta, que tamén implica a unión de poesía e música, desenvolverase en dúas quendas (16.00 e 17.15 h) entre as pedras de Santo Agostiño, por tratarse da antiga sede do Liceo no que participou Rosalía na súa mocidade. A obra de teatro para o público familiar Rosalía, protagonizada por Rocío González e Cris Collazo baixo a dirección de Fina Calleja, poralle o ramo ao Festival Rosalía ás 18.30 horas no Teatro Principal.