A Deputación convoca o XVI Premio Rosalía de Castro da Lingua

O BOP publicou as bases do XVI Premio Rosalía de Castro da Lingua, unha iniciativa da Deputación destinada a recoñecer iniciativas, traballos recentes e traxectorias de persoas, colectivos ou entidades comprometidas coa promoción e dignificación social do noso patrimonio lingüístico, o mesmo no ámbito da provincia que no de todo o territorio autonómico. O xurado terá especialmente en conta a relevancia para o futuro do galego.

Ata o 30 de abril está aberto o prazo de presentación de candidaturas, que deberán tramitarse de xeito telemático, a través da plataforma electrónica da Deputación (SUBTEL).

O certame repartirá 15.000 euros en premios, 5.000 para cada un dos gañadores das tres categorías:

1. Á persoa que máis destaque na promoción da lingua galega de calidade e cunha identidade propia e unhas características xenuínas para empregala en todos os ambientes e con todos os estratos sociais.
2. Á entidade que máis destaque na promoción da lingua galega.
3. Ao proxecto concreto (ferramentas, publicacións, coleccións, portais web...) de dinamización lingüística que realice un traballo específico cos tramos da poboación de menor idade, infancia e mocidade e que atenda espazos emerxentes de uso da lingua co obxectivo de premiar a innovación e o futuro.

Gañadores 2024
Pilar García Negro, Nova Escola Galega e o proxecto 'Aquí tamén se fala!' foron en 2024 os gañadores dun premio que en anteriores edicións tamén recoñeceu o traballo de María Canosa, Pakolas, Xaquín Marín, Proxecto Apego, Asociación de Escritoras e Escritores en Lingua Galega, Museo do Pobo Galego e Agrupación Astronómica Coruñesa ÍO, entre outros.

As bases do certame publicáronse no BOP do 6 de febreiro.