Editorial Nós (1927-1936)
Cada semana destacamos unha das obras da mostra bibliográfica "Notas para unha edición coruñesa: arredor de 180 anos de edición na provincia". Unha selección de obras de editoras da provincia publicadas dende o ano da fundación da biblioteca ata a actualidade.
O libro "Cantigas e verbas ao ar" do escritor e periodista Xulio Sigüenza Raimúndez, publicado no 1928, é un testemuño de como a poesía galega entra na modernidade. Do mesmo xeito que o son outros poemarios publicados tamén pola editorial Nós neses anos: "De catro a catro" de Manuel Antonio ou "O Galo" de Amado Carballo, escritor ao cal se lle dedica "Cantigas e verbas ao ar".
Xusto un ano antes desta publicación nace a editorial Nós, Pubricacións Galegas e Imprenta, o proxecto co que Ánxel Casal continúa o labor, que xa comezara con Lar, de modernizar e difundir o libro galego. De feito Nós comeza no mesmo local onde estaba Lar: no 1º piso do número 36 da rúa Real da Coruña. O selo que identificará a esta nova editorial vai ser un hórreo cuns nenos lendo ao seu carón, unha obra de Castelao da que dirá: "fartura de corpo e de espírito, ese ten que ser o noso país".
Neste novo proxecto editorial (como xa pasara con Céltiga e Lar) o gosto polo deseño e o grafismo é evidente e a ilustración ocupa un papel moi importante. Nós é a editora que ten o maior número e variedade de cubertas ilustradas ata o momento.
A cuberta de "Cantigas e verbas ao ar" foi ilustrada pola artista Lolita Díaz Baliño: un fermoso deseño a dúas tintas, azul e negra, no que predomina unha liña ondulante e que dá como resultado unha imaxe misteriosa que conecta moi ben co contido da obra.
Lolita Díaz Baliño e María Cabo son ás dúas únicas mulleres que ilustran libros en Galicia nesa época.
Ademais nesta publicación atopamos a outra autora mais: a poeta uruguaia Juana de Ibarbourou encárgase do prólogo. Unha autora de ascendencia galega e que escribe en lingua galega este texto no cal invoca para a obra "a tóda-las potencias celestes que teñen o claro dominio da perfecta apreciación da beleza enxebre". Unha chiscadela a ese sentir animista e de amor á natureza que comparten ambos autores.
Esta obra, concibida en Montevideo pero publicada na Coruña, volverá ser editada por segunda vez co título "Verbas do ar" no ano 1957.
