O Plan Único da Deputación inviste preto de 200.000 euros para dotar de saneamento ao lugar de Mantoño, en Porto do Son

A Deputación da Coruña financia na súa totalidade, a través do Plan Único, un proxecto valorado en 193.328 euros que permitirá dotar de saneamento ao lugar de Mantoño, no Concello de Porto do Son.

As obras, que darán servizo a 23 vivendas, consistirán na execución dun colector principal de PVC, conectado á rede existente no lugar de Beneso, ao que se unirán outros cinco ramais secundarios. Tamén se proxecta a habilitación de pozos de rexistro e das acometidas para cada un dos inmobles. Ademais, está prevista a reposición do pavimento afectado durante o transcurso dos traballos.

A actuación está actualmente en fase de licitación no perfil do contratante municipal e o prazo de presentación de ofertas remata o 26 de febreiro.

Preto de 500.000 euros en saneamento

Con este proxecto para o lugar de Mantoño xa son 467.000 euros os que inviste a Deputación da Coruña a través do Plan Único en obras de saneamento no Concello de Porto do Son, que contempla actuacións tamén en Esparelle, Cans e Caamaño.