A Deputación dá o pistoletazo de saída á socialización do Plan de Sostibilidade Turística en Destino “Os fogóns do Anllóns”
O vicepresidente da Deputación e deputado de Turismo, Xosé Regueira, presentou ante os 5 concellos participantes no proxecto os reaxustes do proxecto, toda vez que xa se fixo público que este proxecto foi incluído na Conferencia Sectorial de Turismo cunha concesión de 1,5 millóns de euros de fondos europeos
Xosé Regueira aproveitou a presentación, que tivo lugar na Laracha, para anunciar que 'Os fogóns do Anllóns' será un dos proxectos protagonistas dos actos que o seu departamento desenvolverá en Fitur o vindeiro mes de xaneiro
O vicepresidente da Deputación e deputado de Turismo, Xosé Regueira, e o alcalde da Laracha, José Manuel López Varela, encabezaron esta mañá a presentación do Plan de Sostibilidade Turística en Destino do proxecto 'Os fogóns do Anllóns', toda vez que xa é oficial que este proxecto foi incluído na Conferencia Sectorial de Turismo cunha concesión de 1,5 millóns de euros de fondos europeos.
Na presentación, que tivo lugar no Centro de Interpretación dos Muíños da Costa da Morte en Golmar, participaron alcaldes e concelleiros e concelleiras dos cinco concellos que forman parte do proxecto: Evencio Ferrero e Maica Ures, alcalde e concelleira de Carballo; José Muíño Domínguez e Carlos Allo Cundíns, alcalde e tenente de alcalde de Cabana de Bergantiños; Juan Carlos García Pose, alcalde de Coristanco; Noelia Varela Suárez, primeira tenente de alcalde de Ponteceso; e da Laracha, ademais do alcalde, tamén participaron os concelleiros Moncho Martínez e Pablo Cambón, e a concelleira Patricia Bello.
Tamén participou persoal técnico de turismo da Deputación, dos concellos de Carballo e de Ponteceso, e da empresa EOSA Estrategia y Organización S.A, a encargada de elaborar a candidatura e realizar os diferentes reaxustes en relación aos fondos concedidos, que ascenden a 1,5 millóns de euros. Durante a xuntanza, ademais da "parabenización" por acadar o obxectivo de contar con fondos europeos (os coñecidos como Next Generation) para desenvolver os 4 eixes recollidos na proxecto, Xosé Regueira fixo fincapé na necesidade de socializar e divulgar o propio proxecto entre a comunidade local, tanto social como económica, mais tamén en foros turísticos especializados. Neste sentido, anunciou que 'Os fogóns do Anllóns" protagonizará en exclusiva un dos actos que Turismo da Deputación levará a cabo en Fitur o vindeiro mes de xaneiro. Para realizar esta difusión, Xosé Regueira explicou que se trata de facerlle chegar ao público profesional de Fitur voces representativas "tanto de sectores económicos como toda a parte social relacionada co río Anllóns ao longo do seu percorrido pola comarca". Neste sentido, o vicepresidente recabou a implicación de todos os representantes políticos presentes para implicar á veciñanza e a axentes económicos nesta difusión e socialización do proxecto.
Pola súa banda, o alcalde da Laracha, José Manuel López Varela, aproveitou para poñer en valor a "colaboración institucional para facer realidade este proxecto" e agradeceu expresamente ao departamento provincial de Turismo todo o traballo realizado para crealo e impulsalo. López Varela comprometeu "a máxima colaboración para poñelo en funcionamento o máis rápido posible" e asegurou "que é unha oportunidade moi importante para toda a comarca de Bergantiños".
Convén lembrar que o proxecto 'Os fogóns do Anllóns' está concibido para ofrecer un produto turístico de calidade, baseado na gastronomía local e sostible, e para cumprir cos catro eixes transversais que os fondos Next Generation esixen para acceder ás súas axudas. En canto ao primeiro eixo, a transición verde e sostible, 'Os fogóns do Anllóns' prevé, entre outras accións, a creación dunha rede de miradoiros e doutros espazos novos para usar, por exemplo, como praias fluviais; e tamén limpar e eliminar as especies invasoras nas beiras dos ríos.
No relativo ao segundo eixo, a mellora da eficiencia enerxética, 'Os Fogóns do Anllóns' quere organizar servizos de paseo en embarcacións limpas, rutas de cicloturismo e alugueiro de bicicletas, mesmo en restaurantes, e, sobre todo, apostará polo sendeiro do Anllóns, nuclear do proxecto, de 53 quilómetros que transcorren pola Laracha, Carballo, Coristanco, Ponteceso e Cabana.
A transición dixital é o terceiro eixo. As accións de 'Os Fogóns do Anllóns' irán orientadas neste caso a explicar —con realidade aumentada e códigos QR— a gastronomía local, ou a deseñar aplicacións nas que consultar todo o relacionado co proxecto.
No referido ao cuarto eixo, o da competitividade, 'Os fogóns do Anllóns' buscarían o embelecemento de restaurantes, incentivando, por exemplo, que conten con louza e manteis elaborados na zona. Tamén se potenciarán as feiras e se deseñarán rutas gastronómicas que aposten polo produto de quilómetro 0.
