Narón acolle a Copa Deputación da Coruña, un clásico do fútbol coruñés que estrea novo formato
Os días 16 e 22 de xuño disputaranse no Estadio municipal de Rioseco as semifinais e final da Copa Deputación
Os vencedores das Copas da Coruña, Ferrol, Costa da Morte e Sar disputarán a Copa Deputación 2024
San Tirso e Sigüeiro mediranse por unha praza na final masculina contra o vencedor do Dumbría-O Val. Na competición feminina, o partido polo título sairá dos gañadores dos cruces Victoria CF B-Xallas e EFM Boiro-O Val
O torneo repartirá 28.000 euros en premios e o gañador participará na Supercopa Deputación, contra os campións das provincias de Lugo, Ourense e Pontevedra para optar a unha praza na Copa do Rei
Narón será a sede da Copa Deputación da Coruña, un clásico do fútbol da provincia que este ano estrea novo formato. Por primeira vez, a competición enfrontará aos catro clubs masculinos e aos catro femininos vencedores das copas oficiais da Federación Galega de Fútbol na provincia, que son a Copa A Coruña, Copa Costa da Morte, Copa Ferrol e a Copa Sar.
Así o anunciou esta mañá o deputado de Deportes, Antonio Leira Piñeiro, nun acto celebrado na Deputación para o sorteo dos emparellamentos, no que tamén participaron o vicepresidente da Federación Galega de Fútbol, Juan Luis Villamisar, o secretario da Federación, Diego Batalla, o edil de Deportes de Narón, Iván Santalla, e varios presidentes dos clubs que disputarán esta competición.
A Copa Deputación da Coruña 2024 repartirá un total de 28.000 euros en premios, recibindo 5.000 euros e un trofeo os campións, 4.000 euros os subcampións, 3.000 euros os terceiros clasificados e 2.000 euros os cuartos.
O sorteo dirimiu tanto os cruces como os horarios dos partidos, que se celebrarán no Estadio municipal de Río Seco con entrada de balde para os afeccionados e afeccionadas. Serán eliminatorias a un único partido e con quenda de penaltis para dirimir ao gañador no caso de que haxa empate ao fin do tempo regulamentario.
Semifinais este domingo e gran final o sábado 22 de xuño
Este domingo 16 de xuño celebraranse as catro semifinais. O día arrincará ás 10:00 horas coa disputa do Victoria CF B - Xallas CF por un posto na final feminina. Á partires das 16:30 horas, o gañador desa primeira eliminatoria coñecerá ao seu rival, que sairá do cruce entre EFM Boiro e O Val SD.
Mentres, no cadro masculino, o San Tirso SD e o Sigüeiro CF xogarán ás 12:30 horas a primeira semifinal. O segundo enfrontamento, que pechará o día, comezará ás 19:00 horas e medirá ao Dumbría CF e a O Val SD.
A gran final será o sábado 22 de xuño e os gañadores das categorías masculina e feminina da Copa Deputación da Coruña conseguirán unha praza para a Supercopa Deputación, que disputarán cos gañadores das outras competicións homólogas que se xogan nas provincias de Lugo, Pontevedra e Ourense.
O vencedor da Supercopa Deputación participará na fase previa da Copa do Rei de fútbol a vindeira tempada.
Toda a información, resultados, incidencias e notificacións desta competición realizaranse a través da páxina web www.futgal.es e a intranet da propia federación, nunha xanela específica para a I Copa de Fútbol Afeccionado Deputación da Coruña.
Unha Copa Deputación tamén para o fútbol base
Durante a súa intervención tras sortear os equipos, o deputado de Deportes, Antonio Leira, recalcou que a Copa Deputación será "unha gran festa do fútbol" que "aposta pola igualdade". "A igualdade é algo necesario en todas as facetas da vida e, polo tanto, no deporte. Ten que ser latente e demostrarse con feitos. Nesta Copa Deputación é unha igualdade de condicións, de méritos e de trofeos entre os equipos masculinos e femininos", apuntou Leira.
O responsable de Deportes tamén adiantou que a aposta polo deporte e, en concreto, polo fútbol "non remata aquí". "A Deputación ten moi claro que a mocidade debe ser a bandeira do deporte na provincia. Por iso, xunto coa Federación Galega de Fútbol, estamos a preparar a Copa Deputación da Coruña para mozos e mozas", matizou. "Esperamos poñela en marcha a partires de setembro ou outubro en categorías infantil e cadete. Consideramos que pode ser un escaparate importante e que os deportistas más xoves merecen unha copa deste estilo, cun formato parecido que terá presenza en todo o territorio", sinalou Leira
O deputado tamén quixo agradecer a colaboración da Federación Galega de Fútbol, coa que existe "unha comunicación total" e a "predisposición de Narón" para acoller o evento. Ademais, non se quixo esquecer "do traballo altruísta de directivos e directivas, para os que esta Copa Deputación da Coruña pode ser un bonito colofón á tempada".
Pola súa banda, o edil de Deportes de Narón, Iván Santalla, recoñeceu que o seu municipio "agarda cos brazos abertos" o evento. "Esperamos ter as instalacións nas mellores condicións. Desde logo, será en parte grazas á axuda da Deputación, que cofinancia moitas estruturas deportivas e suma a súa implicación cando toca investir", engadiu o edil naronés.
