A deputada do Plan Único, Cristina García, aborda en Muros o investimento da Deputación no municipio, que supera os 860.000 €

O concello de Muros acolleu esta mañá a visita da deputada de plans provinciais e asistencia a municipios, Cristina García Rey, que se reuniu coa alcaldesa, María Lago Lestón, e con parte da corporación municipal, para facer un balance dos investimentos do Plan Único no municipio, que recibe neste 2025 un total de 862.017,14€ a través desta ferramenta de financiamento local. Ademais, a deputada aproveitou para visitar unha das obras en execución grazas a estes fondos provinciais.

A deputada, Cristina García, sinalou a importancia deste plan para os 93 concellos da provincia, e puxo tamén en valor o esforzo da Deputación, "que prevé investir este ano 125 millóns de euros nos 93 concellos da provincia, mentres que a Xunta destina 116 millóns aos 313 concellos de todo o país, a través do Fondo Galego de Cooperación Local".

Ferramenta "imprescindible" para os orzamentos locais
"O Plan Único representa para os concellos uns fondos provinciais que son imprescindibles para os seus orzamentos, pois en moitos casos chegan a supoñer ata o 30% da súa partida anual", explicou a deputada. Ademais, esta ferramenta "permítelles distribuír con total autonomía os investimentos que reciben da Deputación en función das súas prioridades, fronte aos de outras administracións que lles indican en que proxectos deben ser investidos".

Deste xeito, "e o que é máis importante", engadiu García, "o POS+2025 fomenta o benestar dos veciños e veciñas de todos os municipios da provincia, pois permite mellorar estradas, abastecemento e saneamento de auga, iluminación pública e equipamentos culturais e deportivos, pero tamén permite mellorar as condicións de vida das persoas con dependencia, por exemplo, e investir no reforzo aos servizos sociais".

A alcaldesa de Muros, pola súa banda, sinalou que este plan "nos permite investir en obras, pero tamén en outros proxectos que son máis invisibles como o gasto corrente". Tamén fixo fincapé nos "gastos asociados a servizos sociais" xa que, no caso de Muros, tal e como afirmou "axúdanos a asumir os gastos de axuda a asistencia no fogar que é unha competencia impropia que temos asumida os concellos e que se leva unha suma importante do orzamento municipal". A alcaldesa, ademais, falou dos fondos que destina, con cargo ao Plan Único, "ao mantemento dos servizos de madrugadores, favorecendo a conciliación familiar", e tamén "á factura da electricidade". Para rematar, agradeceu á Deputación "a colaboración, e esa flexibilidade que se nos ofrece, xa que é a axuda máis grande que recibimos os concellos".

Impacto positivo para a veciñanza
A deputada sinalou, ademais que, ademais de promover un impacto positivo na vida da veciñanza, "supón tamén un impulso para a economía local, ao fomentar a contratación de pequenas e medias empresas de construción, enxeñerías e outras de sectores relacionados. Non só se asegura a execución de obras necesarias senón que tamén se axuda a fortalecer o tecido empresarial local, se consolida o emprego e contribúese a fixar poboación".

1 4

Fotogalería