Cultura da Deputación colabora coa Academia Galega do Audiovisual na organización do Ciclo Mestre Mateo 2024
A deputada de Cultura, Natividade González, e o presidente da Academia Galego do Audiovisual, Álvaro Pérez Becerra, asinaron o convenio na sede provincial
A entidade provincial destina 13.170€ a este ciclo que leva os filmes finalistas dos Premios Mestre Mateo ás localidades coruñesas de Betanzos, A Laracha, Vimianzo, Boiro, Valdoviño e Cedeira
A Deputación da Coruña cofinancia con 13.170 euros o Ciclo Mestre Mateo 2024. A deputada de Cultura, Natividade González, e o presidente da Academia Galega do Audiovisual, Álvaro Pérez Becerra, asinaron na sede provincial o convenio, que supón unha achega do 73 por cento do orzamento total da actividade.
O Ciclo Mestre Mateo é un circuíto de cinema galego que exhibe as películas finalistas dos Premios Mestre Mateo. Grazas ao acordo firmado, a Academia Galega do Audiovisual, co apoio da área de Cultura da Deputación da Coruña, impulsa o programa, dirixido a concellos e vilas que desexen incluír na súa oferta cultural as longametraxes de ficción e documentais máis destacadas do audiovisual galego actual.
Este ano, foron Betanzos, A Laracha, Vimianzo, Boiro, Valdoviño e Cedeira as localidades coruñesas onde se proxectan os filmes de ficción "Matria", "Fatum", "¡Salta!" e "O Corno", e os documentais "A viaxe de Lucy", "Chichi e máis eu", "Os espazos en branco" e "Emoción, vida e teatro". Tamén hai espazo para as curtas: "Antes de que se poña o sol", "O coidado", "To bird or not to bird", "O neno sardiña" e "Ulises" puideron verse en Betanzos, A Laracha, Vimianzo, Cedeira e Valdoviño, mentres que "Illa Cordura", "Nena", "O monstro e a nena" e "In Half" chegaron a Valdoviño, Cedeira, Betanzos e Vimianzo.
Natividade González destacou a importancia do convenio e o compromiso do seu departamento en achegar á cidadanía os filmes finalistas dos Premios Mestre Mateo, "que son o mellor exemplo da profesionalidade e calidade dun sector en auxe, avalado polos excelentes resultados de crítica, audiencia e público, e fan que actores, guionistas, presentadores, técnicos, directores e produtores sexan referentes tanto dentro como fóra de Galicia". "E máis", engadiu, "nun ano tan importante para o noso cinema, con películas tan importantes como 'Matria', premiada nos Goya, nos Forqué, nos Feroz ou no Festival de Málaga; ou como "O Corno", tamén galardoada nos Feroz e nos Goya e Concha de Ouro en San Sebastián; as dúas cun percorrido extraordinario, do que debemos gabarnos, no panorama internacional".
