Cultura da Deputación crea o premio José Gil de audiovisuais

A área de Cultura da Deputación da Coruña suma un novo certame ao seu catálogo de premios á creación, o José Gil de audiovisuais. Terá unha dotación de 19.500 euros, 6.500 para cada un dos gañadores das tres categorías a concurso: guión de longametraxes de ficción en lingua galega, guión de longametraxes documentais en lingua galega e traxectoria ou iniciativa de especial relevancia no audiovisual galego.

As candidaturas da modalidade de traxectoria ou iniciativa presentaranse de xeito telemático, a través da plataforma de tramitación electrónica da Deputación (SUBTEL), mentres que os orixinais das categorías de guión deberán remitirse en sobre pechado, polo tradicional sistema de plica. O prazo estará aberto entre o 28 de abril e o 28 de maio. O xurado estará presidido pola Deputada de Cultura, Natividade González, e formado por cinco persoas de recoñecido prestixio no ámbito do audiovisual.

O comisario do certame é o investigador Manolo González, que foi creador e director da Escola de Imaxe e Son da Coruña (1990-1998); profesor na facultade de Comunicación da Universidade de Vigo; responsable da área de cine e vídeo na dirección xeral de Cultura de Luís Álvarez Pousa (1984); creador e director da Axencia Audiovisual Galega da Consellería de Cultura da Xunta de Galicia (2005-2009), e galardoado en varias ocasións nos premios do audiovisual galego. Na actualidade, segue a coordinar o encontro de cineastas Chanfainalab en San Sadurniño (2014-2023), XI premio José Sellier da Academia Galega do Audiovisual. En 2023 recibiu o Premio Losada Diéguez polo seu libro Nos días encantados de agosto. Unha biografía de José Gil.

"Con este novo certame ampliamos unha das nosas liñas de apoio á creación máis importantes, neste caso para fortalecer un sector, o audiovisual, estratéxico para a nosa lingua, a nosa memoria e a nosa proxección cultural", explica González. "E ademais contribuímos á memoria de persoas senlleiras neste campo, como foi José Gil, pioneiro en Galicia da reportaxe fotográfica, o nacemento do cinema de ficción, documental, industrial, educativo e turístico, como tamén da lusofonía audiovisual, os noticiarios, a publicidade, o arquivo fílmico e tantas outras achegas incuestionables do cineasta a prol da modernización de Galicia entre 1910 e 1935".

Pola súa banda, Manolo González, sinalou o "orgullo" de que "exista este premio", porque "reivindica a figura do que algúns consideramos como referente máis importante da industria e do cinema galego como é José Gil. Foi o iniciador das primeiras películas de documental e ficción, a primeira filmoteca de Galicia... un longo etcétera de aspectos que valorizan esta personaxe e a colocan do olimpo do cinema galego como o seu patriarca". O comisario destacou tamén a importancia de "facer visible o traballo audiovisual comprometido co país e coa lingua, e render homenaxe a persoas, iniciativas, ou entidades que traballaron pola defensa dun cinema en versión orixinal galega".

As bases do certame están publicadas no BOP do 22 de abril.